Carmen Avendaño

Avendaño foi a voz que fixo de crisol dun grupo de nais valentes que non ían permitir que aos seus fillos e fillas, vítimas, convertéseselles nos verdugos da sociedade, nos parias, nos delincuentes… sen que se chegase aos verdadeiros delincuentes: os narcotraficantes locais e internacionais, a xudicatura preguiceira ou os políticos conchabados ou tolerantes co negocio da droga nas costas galegas.

Alzou a voz e con ela recuperou a dignidade das vítimas. Carmen é un exemplo de resiliencia. O seu tesón e o de todas esas nais incansables loitaron contra todas as resistencias e derrubaron todas as portas ata sentar no banco dos acusados a boa parte das cabezas dos clans da droga que operaban en Galicia. Gañouse o respecto dos políticos e dos xuíces. Conseguiu moitas cousas. Que os mozos enganchados fosen vistos como o que son, vítimas do negocio doutros. Que a tolerancia social contra os narcos locais, que “coidaban” dos seus veciños financiando equipos de fútbol ou tratamentos médicos para acalar bocas, desaparecese. Que ese inxente dineral e esas propiedades ostentosas dos narcos revertesen nas súas vítimas. Que os políticos se coidasen máis de presumir de determinadas amizades… Defendeu e defende a lei e traballa para cambiala cada vez que esta non responde a realidade social á que se debe.

Hoxe, 35 anos despois, segue traballando na Fundación Érguete, dando cobertura ás persoas afectadas por condutas adictivas e ás súas familias. Porque aínda queda moito traballo por facer.

Carmen Avendaño é o mellor exemplo. Unha loitadora que defende os dereitos e o Dereito fronte aos abusos e as discriminacións. Por iso é unha digna receptora do II Recoñecemento Internacional Acampa á Defensa dos Dereitos Humanos.

www.fundacionerguete.org
www.asociacionerguete.org

Infancia Solidaria

Representada por José Ignacio Díaz Díaz

A ONG participa noutros proxectos, un dos máis recentes é a construción dun centro de atención a menores con diversidade funcional en Guinea Bissau que xestiona a organización AIDA. O centro ten capacidade para atender a case noventa nenos e nenas e ás súas familias. Ofrece asistencia médica, rehabilitación neurolóxica, avaliación de necesidades educativas e integración. Tamén participa no financiamento da Escola infantil e gardería que a organización ANIDAN ten en Luma-Kenia. Nela reciben coidados e educación case medio centenar de menores de 0 a 8 anos orfos e de familias humildes que poden deixar alí aos seus fillos mentres traballan, ao mesmo tempo que son escolarizados.

Durante os seus máis de 15 anos de existencia, Infancia Solidaria participou noutros moitos proxectos internacionais en lugares como Vietnam, achegando material para un centro de atención a nenos con discapacidade intelectual e Etiopía, con accións como a construción de varias edificacións con fins sociosanitarios para atender a menores que necesitan illamento ou asegurar a unha correcta administración da medicación que debe recibir. En Nepal axudou á reconstrución dun fogar para nenos cegos tras o terrible terremoto que destruíu boa parte das edificacións do país e ocasionou a morte de máis de 7000 persoas.

Os socios da ONG son menores de idade españois, cuxos pais ou familiares convertenos en protagonistas da colaboración. As achegas das persoas adultas que axudan á organización, personalízana nun menor da súa contorna, un fillo ou filla, un neto ou neta ou un sobriño ou sobriña. Son menores máis afortunados axudando aos que tiveron menos sorte que eles. O obxectivo é facer partícipe aos máis pequenos desoutra realidade complexa e dura, “que está aí e non podemos, nin queremos ocultar” e facerlles sentir a “agradable sensación da solidariedade”. A finalidade última é que toda esa axuda transforme nunha mellora efectiva da vida e a saúde dos seus iguais que sofren as consecuencias de vivir nesa “outra realidade”.

www.infanciasolidaria.org